Rossiyalik ekspert Yer aholisining yarmi 2050-yilda uzoqni yaxshi ko‘ra olmaydigan bo‘lishini taxmin qilmoqda

2050-yilga borib Yer aholisining 50 foizi uzoqni yaxshi ko‘ra olmaydigan bo‘ladi, bu ko‘p jihatdan axborot texnologiyalarining rivoji bilan bog‘liq. Bu haqda oftalmologiya bo‘yicha rossiyalik dotsent Tatyana Pavlova ma’lum qildi, deb yozmoqda “RIA Novosti”.

Ekspertning aytishicha, miopiyadan aziyat chekadigan odamlar soni yil sayin oshib bormoqda. Rossiyada bolalar va o‘smirlar o‘rtasidagi miopiya holatlari 10 yilda 1,3 marta oshgan.

Uning so‘zlariga ko‘ra, dunyo statistikasi prognozlari 2050-yilda 50 foiz aholi uzoqni yaxshi ko‘ra olmaydigan bo‘lishini ko‘rsatmoqda. Bunda 10 foiz holatda kasallik yuqori darajada bo‘ladi, qariyb bir million kishi ko‘r bo‘ladi.