Janubiy Koreya shifokorlari Farg‘onada tibbiy ko‘riklar o‘tkazdi

Janubiy Koreyaning Yonsey universiteti Severance gospitali shifokorlari Farg‘ona viloyatida bemor bolalarni chuqurlashtirilgan tibbiy ko‘rikdan o‘tkazdi. Bu haqda O‘zA xabar bermoqda.

“Sog‘lom avlod uchun” xalqaro xayriya fondi hamda Severance gospitali o‘rtasida tuzilgan hamkorlik kelishuviga asosan Farg‘ona viloyati ko‘p tarmoqli bolalar tibbiyot markazida koreyalik mutaxassislar Toshkent pediatriya tibbiyot instituti shifokorlari bilan 400 nafarga yaqin tug‘ma nuqsonlar, kuyish va turli operatsiyalar asoratlaridan aziyat chekayotgan bemor bolalarni tibbiy ko‘rikdan o‘tkazdi.

Kam ta’minlangan oilalar farzandlari, “Muruvvat uyi” tarbiyalanuvchilari hamda jiddiy nuqsonli 35 nafar bemor bola operatsiya qilindi va sog‘lom hayotga qaytarildi.

Tibbiy ko‘rik davomida xorijlik shifokorlar tomonidan zarur tavsiya va maslahatlar berildi.