OAV: AQShda 20 yoshli reperni otib ketishdi

XXXTentacion taxallusi bilan tanilgan amerikalik reper Jasey Dueyn Onfroy 18-iyun, dushanba kuni Mayamida vafot etdi. Bu haqda TMZ portaliga tayanib, “TASS” xabar berdi.

Ma’lumotlarga ko‘ra, noxush hodisa reper motosalondan chiqqanida sodir bo‘lgan. Noma’lum shaxs Onfroyning oldiga kelib unga o‘q uzgan va qo‘shiqchining sumkasini olib, voqea joyidan yashiringan. Reper koma holatiga tushgan, biroq keyinroq Brouard okrugi politsiyasining ma’lum qilishicha, reper shifoxonada vafot etgan.

XXXTentacion 1998-yilda Floridadagi Planteyshen shahrida tug‘ilgan. Onfroyning 2017-yilda chiqargan “17” nomli albomi AQShda eng ko‘p sotilgan albomlar reytingi — Billboard 200’da ikkinchi pog‘onani egallagan.