Chili sobiq prezidenti BMT oliy komissari etib tayinlandi

Birlashgan Millatlar Tashkiloti Bosh assambleyasi Chili sobiq prezidenti Mishel Bacheletni BMTning inson huquqlari bo‘yicha Oliy komissari etib tayinladi, deb yozmoqda “Korrespondent.net”.

Bachelet keyingi 4 yil davomida oliy komissar vazifasini bajaradi. G‘arb ommaviy axborot vositalari qaror konsensus asosida qabul qilingani haqida xabar qilmoqda.

Ayni paytda ushbu lavozimni egallab turgan Zayd Ra’d al-Husayn oy oxiriga qadar vazifalarini bajaradi. “Men Mishel Bacheletning bu lavozimga tayinlanganidan xursandman”, – deya o‘z fikrini bildirgan al-Husayn .

Mishel Bachelet 2 marta (2006–2010-yillar va 2014–2018-yillar) Chili prezidentligiga saylangan. 2010-yili “BMT–ayollar” tizimiga rahbarlik qilgan.

Bachelet BMTdagi lavozim ta’sis etilganidan (1993-yil) buyon tayinlangan yettinchi komissar bo‘ladi.