125 kg vaznli erkin kurashchi Davit Modzmanashvili yarim finalda yutqazib qo‘ydi, endi u bronza uchun kurashadi

Indoneziyaning Jakarta va Palembang shaharlarida XVIII yozgi Osiyo o‘yinlari davom etmoqda. Erkin kurash bo‘yicha O‘zbekiston shaharafini 125 kg vazn toifasida himoya qilayotgan Davit Modzmanashvili Osiyo o‘yinlari yarim finalida imkoniyatni boy berib qo‘ydi, deb xabar beradi “Daryo” muxbiri.

Davit yarim finalda eronlik Parviz Hadibasmanjga qarshi gilamga chiqib, 8:11 hisobida (6:4, 2:7) hisobida mag‘lubiyatga uchradi.

Endi u bronza medali uchun hindistonlik Sumit Sumitga qarshi kurashadi.

Ma’lumot uchun, Modzmanashvili nimchorak finalda mezbon, indoneziyalik Dimas Septo Anugharani 10:0, chorak finalda mo‘g‘ulistonlik Natsagsuren Zolbooni 3:0 (1:0, 2:0) hisobida mag‘lub etib, yarim finalga yo‘llanmani qo‘lga kiritgandi.