Shavkat Mirziyoyev Parij shahriga keldi

O‘zbekiston Prezidenti Shavkat Mirziyoyev Fransiya prezidenti Emmanuel Makronning taklifiga binoan 8-oktabr kuni rasmiy tashrif bilan Parij shahriga keldi. Bu haqda O‘zA xabar qiladi.

Ikki davlat bayroqlari bilan bezatilgan “Orli” xalqaro aeroportida davlat rahbarini Fransiyaning rasmiy shaxslari kutib oldi.

Bugun davlat rahbari BMTning Ta’lim, fan va madaniyat masalalari bo‘yicha tashkiloti Bosh direktori Odri Azule bilan uchrashadi. Unda O‘zbekiston va UNЕSCO o‘rtasidagi sheriklikni kengaytirish istiqbollari muhokama etiladi hamda 2018—2021-yillarga mo‘ljallangan qo‘shma Harakatlar rejasi qabul qilinishi kutilmoqda.

Shuningdek, O‘zbekiston Prezidenti Shavkat Mirziyoyev Fransiya Senati raisi bilan va Fransiyaning yetakchi kompaniyalari rahbarlari bilan ham uchrashishi ko‘zda tutilgan.