AQShning 11 shtatidagi yahudiy markazlari portlatish bilan tahdid qilingan xabarlar oldi

AQShda kamida 15 ta yahudiy madaniy markazi va maktabi portlatish bilan tahdid qilingan xabarlar oldi. Bu haqda “Korrespondent.net” ma’lum qildi.

Euronews telekanaliga ko‘ra, mamlakatning 11 shtati, jumladan, Nyu-York, Shimoliy Karolina, Alabama, Florida, Indiana, Nyu-Jersi va Pensilvaniyadagi yahudiy muassasalari 27-fevral, dushanba kuni shunday mazmundagi xabarlar olgan.

Mazkur tahdidlar munosabati bilan ushbu muassasalar xodimlari, tashrif buyuruvchilari va o‘quvchilari evakuatsiya qilindi.

Bir hafta avval portlatish qurilmalari joylashtirilgani haqidagi tasdiqlanmagan xabarlardan so‘ng 10 dan ortiq yahudiy markazida evakuatsiya o‘tkazishga to‘g‘ri kelgandi. Yil boshidan beri esa AQShda 70 dan ortiq shunday holat qayd etildi.