Samarqandlik imomlar maktablarda diniy-ma’rifiy suhbatlar o‘tkazmoqda

Samarqand viloyatida diniy soha xodimlari uchun “Dushanba – ta’lim muassasalari bilan ishlash kuni” deb belgilangan. Bu haqda O‘zbekiston musulmonlari idorasi xabar bermoqda.

Joriy yilning 21-yanvar kuni viloyatning Kattaqo‘rg‘on, Narpay, Urgut, Payariq, Ishtixon, Jomboy tumanlarida ham shu kunlarda maktab o‘quvchilari bilan “Islomning ilm olishning fazilatlari”, Internet tarmog‘idagi tahdidlar, “Islomda vaqtning qadri”, “Tinchlik — ulug‘ nemat” kabi mavzularda suhbatlar o‘tkazildi.

Ushbu uchrashuvlardan ko‘zlangan asosiy maqsad o‘quvchi yoshlarga musaffo islomni yetkazish, dunyodagi yagona najot ilm-u ma’rifatning insoniyatga zarurati, yoshlarni turli yot g‘oyalar ta’siridan himoya qilish, “ommaviy madaniyat” ko‘rinishidagi milliy o‘zligimiz, turmush va hayot tarzimizga mutlaqo zid bo‘lgan kiyinish va xulq-atvor ko‘rinishlaridan qaytarish, yoshlarga qaratilgan turli tahdidlar, diniy aqidaparastlikka yo‘naltirilgan ta’limotlaridan ogoh etishdir.