Chelyabinskda erkak 9-qavatdan sakrab, omon qoldi

Chelyabinskda yong‘indan qochgan erkak to‘qqizinchi qavatdagi derazadan sakradi va tirik qoldi, deya xabar beradi “Vesti.ru”.

Ma’lumotlarga ko‘ra, yakshanba kuni kechqurun, “112” qutqaruv xizmatiga Zaxarenko ko‘chasidagi ko‘p qavatli uyda yong‘in yuzaga kelgani haqida chaqiruv tushgan.

Erkak qutqaruvchilarni kutmasdan, o‘zini to‘qqizinchi qavatda joylashgan uyning derazasidan pastga tashlagan. 1966-yilda tug‘ilgan erkak tirik qolgan va kasalxonaga yotqizilgan.

Favqulodda vaziyatlar vazirligining ma’lumotlariga ko‘ra, yong‘in oshxonada yuzaga kelgan va bir zumda butun uyni qamrab olgan. Yuqori harorat tufayli oynalar yorilib, havo oqimi olovni kuchaytirgan. Qo‘shni xonadonlarga zarar yetmagan.