O‘zbekiston va Eron TIVlari o‘zaro munosabatlardagi ijobiy jarayonlarni e’tirof etdi

O‘zbekiston Tashqi ishlar vazirligida 13-mart kuni Eron tashqi ishlar vaziri o‘rinbosari Ibrohim Rahimpur boshchiligidagi delegatsiya ishtirokida O‘zbekiston—Eron vazirliklararo siyosiy maslahatlashuvlarining beshinchi raundi bo‘lib o‘tdi. Bu haqda O‘zbekiston TIV matbuot xizmati xabar bermoqda.

Uchrashuv davomida turli shakllardagi ikki tomonlama hamkorlikning hozirgi holati va istiqboli muhokama qilindi hamda ayrim xalqaro va mintaqaviy masalalar yuzasidan fikr almashildi.

Davlatlararo munosabatlarni rivojlantirishda, shuningdek, BMT, Shanxay hamkorlik tashkiloti, Islom hamkorlik tashkiloti doirasidagi aloqalarda kuzatilayotgan ijobiy jarayonlarga e’tibor qaratildi.

Savdo-iqtisodiy, investitsiyaviy, transport-kommunikatsion aloqalarni chuqurlashtirishdan ikki tomon ham manfaatdor ekanligi qayd etildi.

Shu nuqtayi nazardan “O‘zbekiston—Turkmaniston—Eron—Ummon” mintaqalararo transport koridorini ishga tushirish alohida ahamiyat kasb etishi ta’kidlandi.

Muzokaralar chog‘ida vazirliklararo siyosiy maslahatlashuvlarni doimiy asosda o‘tkazish ikki tomonlama munosabatlar kun tartibidagi dolzarb masalalarni tizimli ko‘rib chiqish, hamkorlikning O‘zbekiston va Eron manfaatlariga mos keluvchi yo‘nalishlarini birgalikda ishlab chiqish imkonini berishi e’tirof etildi.

Xabar berishlaricha, maslahatlashuvlarda Eron elchisi Bahman Og‘oroziy Do‘rmoniy ishtirok etdi.

“Daryo”ning Telegram’dagi rasmiy kanali — @toshqindaryo’ga a’zo bo‘ling!