“Milan” Chempionlar Ligasi yo‘llanmasidan quruq qoldi

28-aprel, yakshanba kuni futbol bo‘yicha Italiya chempionatining 34-turida “Milan” safarda “Torino”ga mag‘lub bo‘ldi (0:2).

Jennaro Gattuzo jamoasi ketma-ket 5 ta g‘alabali seriyasidan so‘ng oxirgi 7 ta o‘yinning 2 tasida durang o‘ynagan bo‘lsa, 4 ta uchrashuvda esa mag‘lubiyatga uchradi va atigi bitta o‘yinda g‘alaba qozondi. Natijada jamoa kelasi mavsum Yevropa Chempionlar Ligasida o‘ynamaydigan bo‘ldi.

Ma’lumot uchun, klub 56 ochko to‘plagan holda musobaqa jadvalida 7-o‘rinda bormoqda. “Atalanta” va “Torino” klublari hisobida ham 56 ochkodan mavjud, lekin ular qo‘shimcha ko‘rsatkichlarga ega.

Kelasi mavsum Italiyaning 7 ta klubi yevrokuboklarda: 4 tasi Yevropa Chempionlar Ligasida, 3 tasi esa Yevropa Ligasida ishtirok etadi.

Agar 8-o‘rinda borayotgan “Latsio” (55 ochko) Italiya Kubogi finalida “Atalanta”ni yutsa, A Seriyani 7-o‘rindan pastki pog‘onalarda tugatsa ham Yevropa Ligasida ishtirok etadi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!