O‘zbekiston meva va sabzavotlari Ukraina bozorlaridan joy olmoqda

O‘zbekistonning Kiyevdagi elchixonasi ko‘magida O‘zbekiston meva va sabzavotlarini Ukraina bozorlariga eksport qilishni ta’minlash bo‘yicha izchil ishlar amalga oshirilmoqda. Bu haqda Spot xabar beradi.

Xususan, Ukraina tadbirkorlari bilan 3 million AQSh dollari miqdorida yangi meva-sabzavot mahsulotlarini, quritilgan mevalar va tayyor to‘qimachilik mahsulotarini yetkazib berish bo‘yicha shartnomalar imzolandi.

Kelishuvlar natijalariga ko‘ra, O‘zbekistonda yetishtirilgan meva va sabzavot mahsulotlari Ukrainaning Lvov shahrida yirik meva-sabzavot bozori “Shuvar”ga yetkazib berildi.

Ta’kidlash joizki, 2019-yilning birinchi to‘rt oyida O‘zbekiston bilan Ukraina o‘rtasidagi tovar aylanmasi 130 mln AQSh dollarini (2018-yilga nisbatan 102,4%) tashkil etdi.

Shu bilan birga, Ukrainaga eksportning oshishi 11 million AQSh dollarini tashkil etdi (2018-yilning shu davriga nisbatan 126%), Ukraina mahsulotlarining mamlakatga importi 7 foizga kamaydi va 85,6 mln AQSh dollarini tashkil etdi.

Hozirda Kiyev, Dnepropetrovsk va Xarkovda yangi savdo maydonchalarini ochish bo‘yicha faol muzokaralar olib borilmoqda.