O‘zbekistonda yengil avtomobillar importi ortib bormoqda

Joriy yilning yanvar-may oyida import hajmi 9,3 milliard dollarga (o‘sish sur’ati 31,3 foiz) teng bo‘ldi. Bu haqda Davlat statistika qo‘mitasi ma’lumotlari dalolat beradi, deb yozadi Spot.

Import tarkibida eng katta ulush mashina va asbob uskunalar hamda ularning qismlari (43,4%), kimyo mahsulotlari va undan tayyorlangan buyumlar (13,6%) hamda qora metallar va undan tayyorlangan buyumlar (7,7%) guruhlari hisobiga to‘g‘ri keldi.

Yanvar-may oyida 154,6 million dollarlik yengil avtomobillar import qilindi, bu 2018-yilning shu davriga nisbatan deyarli 1,9 barobar ko‘pdir.

Ma’lumotlarga ko‘ra, yuk avtomobillari va maxsus avtomobillar import hajmi ham ortib, 200 million dollarni tashkil etdi.

Mashina va asbob-uskunalar asosan Xitoy (1,2 milliard dollar), Koreya (776 million dollar), Rossiya (307 million dollar), Turkiya (274 million dollar) va Germaniyadan (251 million dollar) import qilingan.