Gondurasda Denge bezgagidan vafot etganlar soni 155 nafarga yetdi
Gondurasda yil boshidan buyon 155 nafar odam Denge bezgagi kasalligi asoratlari sabab vafot etdi, deb xabar bermoqda “RIA Novosti”.
Gonduras sog‘liqni saqlash vazirining o‘rinbosari Roberto Kosensining so‘zlariga ko‘ra, Denge epidemiyasi mamlakatda 43 haftadan beri davom etmoqda. Kasallikka chalinish holati 94 ming nafar mahalliy aholi vakilida kuzatilgan, ularning 18 ming nafari Dengening o‘tkir formasi bilan kasallangan. Vafot etganlarning 53 foizini besh yoshdan to‘qqiz yoshgacha bo‘lgan bolalar tashkil qiladi.
Mavzuga doir: Filippinda Denge bezgagi qurbonlari soni 800 kishidan oshdi
Mahalliy OAV xabariga ko‘ra, Gonduras shifoxonalari Denge bilan kasallanish holatlariga qarshi kurasha olmayapti. Mamlakat hukumati bu oxirgi 50 yil ichida Gondurasda kuzatilgan eng yomon vaziyat ekanligini ta’kidlagan.
Mavzuga doir: Singapurda Denge bezgagidan o‘lish ko‘rsatkichi yuqori darajaga yetdi
Denge — virusli infeksiya bo‘lib, tropik va subtropik hududlarda nisbatan keng tarqalgan. Bemorda yuqori harorat, ko‘ngil aynishi, bosh va bel og‘rig‘i, toshmalar kuzatiladi. Hozirda Denge bezgagiga qarshi vaksina yo‘q.
Manba: Daryo.uz