Toshkentdagi avtobus yo‘nalishida elektron to‘lov tizimi sinovi boshlandi

Toshkent shahridagi 155-yo‘nalishda harakatlanuvchi avtobuslarning birida qatnov uchun elektron to‘lov tizimi sinovi boshlandi. Bu haqda “Gazeta.uz” xabar bermoqda.

Sinovlar yakunlanganidan so‘ng tizim mazkur yo‘nalishning barcha avtobuslari, keyinchalik “Avtosantrans” xususiy korxonasi xizmat ko‘rsatadigan boshqa ikki yo‘nalishda joriy etilishi mumkin. Kelgusida boshqa avtobus parklari, yo‘nalishdagi taksilarni ham tizim bilan jihozlash mo‘ljallangan.

“Loyiha tizimga ulangan istalgan yo‘nalishlar, o‘z-o‘zidan, transportning istalgan turlarida foydalanish mumkin bo‘lgan yagona transport kartasi joriy etilishini ko‘zda tutadi. Kartada uning egasi haqida ma’lumotlar bo‘lishi rejalashtirilmoqda: bu yo‘lovchi oqimi hamda talab katta bo‘lgan yo‘nalishlarning aniq hisobini yuritish imkonini beradi”, — deya ma’lum qildi tizimni ishlab chiqqan VIA Tashkent kompaniyasi direktori Murod Obidov.

Mahalliy Mikroelektronika PLUS kompaniyasi tomonidan yaratilgan va salonning oldingi qismida o‘rnatilgan NFC-validator karta egasini bir zumda aniqlaydi va yo‘l haqini olib qoladi. Buning uchun NFC texnologiyasini qo‘llovchi smartfondan ham foydalanish imkoniyati yaratilgan.

Foydalanuvchilar dasturni bepul o‘rnatib olishi mumkin. Ularning ro‘yxatdan o‘tkazilishi qatnovlari tarixini ko‘rib borishlari, balansni to‘ldirishlari va pulni yechib olishlari uchun zarur.

Shaxsiy ma’lumotlar yo‘lovchilarning turli toifalari — maktab o‘quvchilari, talabalar, pensionerlar uchun imtiyozlar taqdim etilishi ehtimoli uchun ham zarur. Hisobni mobil yoki internet-to‘lov tizimlaridan biri yoki yo‘nalishdagi to‘lov punktlarida to‘ldirish ham mumkin bo‘ladi. Bir yoki bir necha qatnovni amalga oshiradigan yo‘lovchilar uchun ro‘yxatdan o‘tishni talab qilmaydigan kartalar chiqariladi.

“Daryo”ning Telegram’dagi rasmiy kanali — @toshqindaryo’ga a’zo bo‘ling!