Filippin prezidenti Xitoy da’vogarlik qilayotgan orolga mamlakat bayrog‘ini o‘rnatmaydi

Filippin prezidenti Rodrigo Duterte Xitoy bilan hududiy bahs mavzusiga aylangan orollardan biriga mamlakat bayrog‘ini shaxsan o‘rnatish rejasidan voz kechdi. Bu haqda u Saudiya Arabistonidagi yurtdoshlari bilan uchrashuvda aytib o‘tdi, deb yozadi “TASS”.

Prezidentning so‘zlariga ko‘ra, u Pekinning tegishli iltimosidan so‘ng o‘z niyatidan voz kechgan. “Men Xitoy bilan do‘stligimizni qadrlaganim tufayli u yerga borib bayrog‘imizni o‘rnatmayman”, — dedi Duterte.

Uning qo‘shimcha qilishicha, u Janubiy Xitoy dengizidagi Pekin Filippin bilan talashayotgan orollarga ham shaxsan tashrif buyurmoqchi emas.

O‘tgan hafta prezident 12-iyun — mamlakat mustaqilligi kunida Manila nazorati ostidagi bahsli Pagas oroliga jo‘nab, u yerda milliy bayroqni o‘rnatish niyati haqida ma’lum qilgan edi.