PSJ Pogba uchun “Manchester Yunayted”ga ikki futbolchisini taklif qiladi

PSJ klubi “Manchester Yunayted” yarim himoyachisi Pol Pogbani qo‘lga kiritmoqchi.

Sports Mole nashrining xabar qilishicha, parijliklar Pogba transferi kelishuviga Anxel di Mariya va Yulian Drakslerni qo‘shishga tayyor.

Fransiyalik futbolchining xizmatlariga “Yuventus”, “Real” va “Inter”dan ham qiziqish bor. O‘tgan yozda “Manchester Yunayted” Pogbaga 150 million yevro narx belgilagandi.

Di Mariya 2014/15-yilgi mavsumda “Manchester Yunayted”da to‘p surgan. Avval boshida argentinalik futbolchi “Real”dan parijliklar safiga yo‘l olishni istagan, biroq PSJ moliyaviy feyr-pley qoidalari sabab uni sotib ololmagandi.

Pogbaning Manchester shahri klubi bilan amaldagi shartnomasi 2021-yilning yoziga qadar mo‘ljallangan. “Manchester Yunayted” kelishuvni bir yilga uzaytirish huquqiga ega.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!