Hindistonda koronavirusga qarshi antitanalarni aniqlovchi test yaratildi

Hindiston Virusologiya milliy instituti inson organizmi SARS-CoV-2 koronavirus infeksiyasiga qarshi ishlab chiqaradigan antitanani aniqlovchi immunoferment tahlilni yaratdi. Bu haqda mamlakat sog‘liqni saqlash vaziri Xarsh Vardxanga tayanib, “RIA Novosti” xabar berdi.

Vazirning so‘zlariga ko‘ra, test qon namunalaridagi immunoglobulinni aniqlaydi. Immunoferment tahlil odatda OIV-infeksiyani aniqlashda ishlatiladi.

“Ushbu jamlanma Mumbaydagi ikki hududda tekshirib ko‘rildi va yuqori aniqlik hamda sezuvchanlikka ega. Bundan tashqari, u bir vaqtning o‘zida 2,5 soat ichida 90 ta namunani testdan o‘tkazish qobiliyatiga ega, bu esa tibbiyot xodimlariga tezkorlik bilan bemorlarni aniqlashda zarur choralarni ko‘rish imkonini beradi”, — deb yozadi Vardxan o‘zining Twitter’dagi sahifasiga.

Shuningdek, uning so‘zlariga ko‘ra, Virusologiya milliy instituti Hindistonning Zydus Cadila farmatsevtika kompaniyasiga testni ommaviy ishlab chiqarish texnologiyasini topshirgan bo‘lib, dori-darmonlar nazorati bo‘yicha bosh boshqarma kompaniyaga dori vositalarini ishlab chiqarish ruxsatini bergan.

Avvalroq Hindistonda koronavirusni qon plazmasi bilan davolash usuliga shubha bilan qaralayotgani to‘g‘risida xabar berilgandi.

Mavzuga doir: Olimlar COVID-19’ga qarshi kurashning 4 xil strategiyasini belgilab berdi

Eslatib o‘tamiz, aprel oyining boshlarida O‘zbekistonda koronavirusdan tuzalganlarning qon zardobidan antitana maqsadida foydalanilishi ma’lum qilingandi.