Samarqandda “Askar onalarini sharaflaymiz!” madaniy-ma’rifiy tadbiri bo‘lib o‘tdi

14-yanvar — Vatan himoyachilari kuni munosabati bilan Samarqand viloyati hokimligi, mudofaa ishlari boshqarmasi va boshqa tashkilotlar hamkorligida “Askar onalarini sharaflaymiz!” deb nomlangan madaniy-ma’rifiy tadbir tashkil etildi, deb xabar beradi O‘zA.

Madaniy-ma’rifiy tadbirda samarqandlik onalar Buxoro viloyatida muddatli harbiy xizmatni o‘tayotgan farzandlari bilan uchrashdi.

“Viloyatimizning barcha tuman, shaharlaridan kelgan ayollarni ko‘rib, xotin-qizlar qo‘mitasi biror tadbir uyushtirgandir-da deb o‘yladim. Boshqalardan so‘rasam, ular ham nima sababdan chaqirishganini bilmasliklarini aytishdi. Birozdan so‘ng viloyat xotin-qizlar qo‘mitasi vakillari, harbiy xizmatchilar kelib, bugun harbiy xizmatni o‘tayotgan farzandlaringiz bilan uchrashasizlar, deyishganida avvaliga hayron bo‘lib bir-birimizga qaraymiz, deng. Keyin quvonchdan chapak chalib yuboribmiz. Bir lahzadan so‘ng qo‘lida guldasta ko‘tarib, biz tomon shaxdam qadamlar bilan kelayotgan askarlar orasida o‘g‘lim Shahbozbekni ko‘rdim-u yugurib borib, bag‘rimga bosdim”, — deydi payariqlik Nilufar Haydarova.

“Registon maydonidagi diydorlashuvdan so‘ng ishtirokchilar O‘zbekiston Respublikasining Birinchi Prezidenti Islom Karimov haykali poyiga gullar qo‘ydi. Samarqand shahridagi tarixiy obidalar, muzey va madaniyat maskanlariga sayohat uyushtirildi”, — deyiladi xabarda.

Askarlar o‘zlari xizmat qilayotgan harbiy qismlarda yaratilgan sharoit va imkoniyatlar, xizmat jarayoni haqida onalariga so‘zlab berdi.