Andijonlik fermerning dalasida paxta ochildi

Andijon viloyatining Shahrixon tumanidagi “Qashqar diyori” fermer xo‘jaligi dalalarida g‘o‘zadan oppoq paxtalar ko‘rindi. Bu haqda O‘zA xabar berdi.

— Joriy yilning mart oyi boshida 20 gektar yerga umid bilan paxtaning “Andijon-35” navini ekkan edik, — deydi xo‘jalik rahbari Toymirza Yusupov. — 20-mart sanasida chigitlar unib chiqqan bo‘lsa, 14-iyunda gul ko‘rsatdi. 22-iyun kunidan boshlab esa ko‘saklar paydo bo‘ldi. Hozir g‘o‘za poyasida o‘rtacha 15 donadan ko‘sak bor.

Toymirza akaning aytishicha, bu yil paxtalarning ochilishi o‘tgan yilga nisbatan 10 kunga kechikibdi.