OAV: Trampning Buyuk Britaniyaga tashrifi kuzga qoldirildi

AQSh prezidenti Donald Trampning Buyuk Britaniyaga tashrifi iyundan oktabr oyiga ko‘chirildi. Bu haqda The Sun manbalariga tayanib, “TASS” xabar bermoqda. 

“AQSh prezidenti va Britaniya bosh vaziri Tereza Mey tashrifni kuzgacha, Trampning musulmon muhojirlarni mamlakat hududiga kelishini man qiluvchi farmoni atrofidagi bahslar tinchiguncha qoldirishga kelishib oldi. Tramp bu boradagi xavotirini Mey bilan ikki hafta oldin bo‘lib o‘tgan telefon orqali muloqoti chog‘ida bildirdi”, — deyiladi nashrda e’lon qilingan maqolada. 

Ma’lumot uchun, Trampning Londonga tashrifiga qarshi petitsiyani 1,86 million britaniyalik qo‘llab-quvvatladi, mamlakatda o‘n minglab kishi qatnashgan norozilik namoyishlari bo‘lib o‘tdi.