Qozog‘iston parlamenti konstitutsiyaga kiritiladigan o‘zgartirishlar loyihasini birinchi o‘qishda ma’qulladi

Qozog‘iston parlamenti majlisi va senati (quyi va yuqori palatalari) deputatlari 3-mart kuni bo‘lib o‘tgan majlisda “Qozog‘iston Respublikasi Konstitutsiyasiga o‘zgartirishlar va qo‘shimchalar kiritish to‘g‘risida”gi qonun loyihasini birinchi o‘qishda ma’qulladi, deb yozadi “Kommersant”.

Hokimiyat tarmoqlari o‘rtasida vakolatlarni qayta taqsimlash taklifi bilan Qozog‘iston prezidenti Nursulton Nazarboyev o‘tgan yilning dekabrida chiqqan edi. Yanvarda Qozog‘iston davlat OAVlari konstitutsiyaga kiritish taklif etilayotgan o‘zgartirishlar loyihasini taqdim qilgan edi. Hujjat, shu jumladan, prezidentning qator vakolatlarini parlament va hukumatga berish hamda vazirlar mahkamasining ijtimoiy-iqtisodiy jarayonlarni tartibga solish borasidagi mas’uliyatini oshirishni ko‘zda tutadi.