Toshkentda xayriyalar sovutgichi paydo bo‘ldi (foto)

Toshkentning Chilonzor tumanidagi “Kasbino” do‘koni oldida “Mehrli sovutgich” o‘rnatildi, deb xabar berdi Sputnik.

Bir necha kun ichida ushbu loyiha ijtimoiy tarmoqlarda mashhur bo‘lib ketgan.

Sovutgich turli oziq-ovqat mahsulotlari bilan to‘ldirilgan. Ehtiyojmand insonlar sovutgichdagi mahsulotlardan bepul foydalanishlari, imkoniyati borlar esa uni oziq-ovqat mahsulotlari bilan to‘ldirishlari mumkin.

Hozirda sovutgichda sut, meva va sabzavot kabi mahsulotlarni topish mumkin.

Eslatib o‘tamiz, “Mehrli qo‘llar” loyihasi 2017-yilda “Saxovat” nomi bilan ijtimoiy tarmoqlarda ish boshlagan edi. Keyinchalik, 2018-yil 30-avgustda Adliya vazirligi tomonidan Imkoniyati cheklangan yoshlar va bolalar markazining “Mehrli qo‘llar” loyihasi sifatida tasdiqlangan. Ushbu loyiha bemorlar, kam ta’minlangan insonlarga yordam berib kelmoqda.