Surxondaryoda 26 kishiga soxta aviachipta sotgan qizga nisbatan jinoyat ishi qo‘zg‘atildi

Surxondaryoda ikki oyda 26 kishini “uxlatgan” qizga jinoyat ishi ochildi, deb xabar berdi O‘zA.

Surxondaryo viloyati Denov tumanidagi Yangi hayot mahallasida yashovchi Soliya Salimova (ism-shariflar o‘zgartirildi) mo‘may daromad ko‘rishning antiqa yo‘lini o‘ylab topadi.

U tuman markazida joylashgan aviakassada soxta aviachipta sotib, boyimoqchi bo‘ladi. Shu maqsadda joriy yilning mart va aprel oylarida Rossiyaga ketmoqchi bo‘lgan 26 fuqaroga naqd 48 million 515 ming so‘mlik soxta aviachiptani pullab, ularni chuv tushirib ketadi.

Bu haqda tumandagi Yurchi mahallasida yashaydigan, vaqtincha ishsiz Qayum Nabiyev ichki ishlar idorasiga murojaat etib, xabar bergach, 23 yoshdagi “uddaburon” qizning nayrangi fosh etildi.

Mazkur holat bo‘yicha Soliya Salimovaga nisbatan O‘zbekiston Respublikasi Jinoyat Kodeksining tegishli moddasi bilan jinoyat ishi qo‘zg‘atildi.