“Olmaliq” futbol klubi 2018-yilni ruscha nom bilan boshlaydi — “AGMK”

O‘zbekiston Super Ligasida ishtirok etuvchi “Olmaliq” futbol klubining nomi o‘zgardi. Bu haqda klub rasmiy sayti ma’lumot berdi.

2018-yilgi mavsumdan boshlab Olmaliq shahri klubi “AGMK” deb yuritiladi. 2008-yilga qadar ham klub aynan “AGMK” nomida bo‘lgani aytilgan. O‘z vaqtida “Olmaliq” futbol klubi “OTMK” nomi bilan O‘zbekiston chempionatida ishtirok etgandi.

“AGMK” — Almalikskiy gorno-metallurgicheskiy kombinat birikmasining qisqartmasi hisoblanadi. Uni o‘zbek tilida Olmaliq kon metallurgiya kombinadi, ya’ni, “OKMK” nomi bilan ham yuritish mumkin edi. Jamoaning yangi ishlab chiqilgan logotipidan esa aynan ruscha so‘zlarning qisqartmasi o‘rin oldi.

Yangi logotip o‘zida sariq va qora ranglarni aks ettirgan. “AGMK” klubi kelasi mavsumdan boshlab aynan shu rangli liboslarda harakat qiladi.