Suriyada Rossiyaning Ka-52 vertolyoti halokatga uchradi

Rossiyaning Ka-52 vertolyoti Suriyaning sharqiy tumanlari osmonida rejali parvozni amalga oshirish chog‘ida halokatga uchradi, deb yozadi “RIA Novosti”.

Ikkala uchuvchi ham halok bo‘ldi, ularning jasadlari aerodromga yetkazildi.

“Dastlabki ma’lumotga ko‘ra, hodisaga texnik nosozlik sabab bo‘lgan bo‘lishi mumkin”, — deyiladi Rossiya mudofaa vazirligi bayonotida.

Nashr eslatishicha, bu oy boshidan buyon rossiyalik harbiylarning Suriyadagi halokati bilan bog‘liq ikkinchi holatdir. 3-may kuni Rossiyaning Su-30SM qiruvchisi Xmeymim aerodromidan uchib chiqqanidan keyin qulab tushgan edi, ikkala uchuvchi ham voqea joyida halok bo‘lgan.