Farg‘onada xonadondan 3 ming dollar o‘g‘irlagan shaxs ushlandi

Farg‘ona viloyatining Farg‘ona tumanida xonadondan pul o‘g‘irlash bilan bog‘liq jinoyat sodir etildi. Bu haqda “Daryo”ga viloyat IIB matbuot xizmati xabar berdi.

Farg‘ona tumani “Mindon” mahalla fuqarolar yig‘ini Haqiqat ko‘chasidagi xonadonlardan birining yotoqxonasidan kuppa-kunduz kuni 3000 AQSh dollari hamda 700 ming so‘m pul noma’lum shaxs tomonidan o‘g‘irlab ketilgan. Uy egasi Z. Mirzaahmedovning tuman IIBga yozgan arizasiga binoan olib borilgan tezkor tadbir natijasida 19 yashar gumonlanuvchi qo‘lga olindi.

Holat yuzasidan jinoyat ishi qo‘zg‘atilib, tergov harakatlari olib borilmoqda.