Orolbo‘yi quyosh energetikasi texnologiyalarini qo‘llagan holda tiklanadi

Innovatsion rivojlanish vazirligida professor Do Seonom boshchiligidagi Koreya (Koryo) universiteti delegatsiyasi bilan uchrashuv bo‘lib o‘tdi. Delegatsiya a’zolarini vazirning birinchi o‘rinbosari Sh. Rajabboyev qabul qildi, deya xabar beradi “Daryo”ga vazirlik axborot xizmati.

Uchrashuvda professor Do Seonom quyosh energetikasi texnologiyalarini qo‘llagan holda Orol dengizi va Orolbo‘yi hududlarini tiklashga qaratilgan Assure loyihasi haqida ma’lumot berdi. Ayni kunlarda jahondagi global muammolar bilan shug‘ullanadigan Koreya (Koryo) universitetining Green School doktorantlari, yetakchi olimlar mazkur loyiha ustida ishlamoqda.

Muzokaralar natijasida tomonlar mazkur loyihani hamkorlikda amalga oshirish maqsadida joriy yilning aprel oyida Green School va Innovatsion rivojlanish vazirligi o‘rtasida memorandum imzolash va loyihani bosqichma-bosqich amalga oshirish bo‘yicha “Yo‘l xaritasi” tuzishga kelishildi.