Karmanalik yosh navoiyxonga Prezident sovg‘asi — Spark avtomashinasi berildi
Navoiy viloyatida buyuk mutafakkir Alisher Navoiy tavalludining 578 yilligi munosabati bilan, o‘quvchi-yoshlar o‘rtasida “Yosh navoiyxonlar” ko‘rik-tanlovi tashkil etildi. Bu haqda Xalq ta’limi vazirligi xabar bermoqda.
Tanlovdan ko‘zlangan asosiy maqsad, yoshlar o‘rtasida Navoiyning boy ijodiy merosini keng targ‘ib qilish, ulug‘ shoir yaratgan asarlardagi Vatanni sevish, ota-onaga hurmat hamda kasb-hunar egallash kabi ezgu g‘oyalarni ular ongiga singdirishdan iboratdir, deyiladi xabarda.
Mazkur tanlovning quyi bosqichlarida 2 mingdan ortiq o‘quvchi-yoshlar qatnashdi. Viloyat bosqichida esa 6 nafar nomzodlarning bilimlari sinovdan o‘tkazildi hamda hakamlar hay’atining belgilangan mezonlari asosida baholandi. Yakuniy natijalarga ko‘ra, Karmana tumanidagi 28-sonli maktab o‘quvchisi Komila Hamroyeva “Yosh navoiyxonlar” ko‘rik-tanlovi g‘olibi deb topildi va Prezident sovg‘asi Spark avtomobili bilan taqdirlandi.
2 va 3-o‘rinni egallagan o‘quvchi yoshlarga esa noutbuk hamda kompyuter jamlanmalari berildi.
Manba: Daryo.uz