TIV o‘zbekistonliklarni xorijda pasportni begona shaxslarga bermaslik kerakligi haqida ogohlantirdi

O‘zbekistonlik Jasurbek Toshpo‘latov joriy yil 25-mart kuni Qozog‘istondagi diplomatik vakolatxonaga murojaat qilib, hisobga qo‘yib berish bahonasida olib qo‘yilgan pasportini qaytarib olishda yordam ko‘rsatishni so‘radi. Bu haqda O‘zbekistonning Olmaotadagi bosh konsulxonasi ma’lum qildi.

30-mart kuni unga O‘zbekistonga qaytish guvohnomasi berildi. Shu bilan birga, pasporti qonunga xilof tarzda olib qo‘yilgani haqida ariza bersa, mazkur masala Qozog‘iston huquqni muhofaza qilish organlari bilan hamkorlikda ko‘rib chiqilishi tushuntirildi .

Ushbu va shunga o‘xshash boshqa holatlardan kelib chiqqan holda TIV konsullik-huquqiy departamenti xorijga chiquvchi o‘zbekistonliklarga hech bir holatda va har qanday vajga qaramay pasportni begona shaxslarga bermaslik kerakligini eslatdi.